Rowne/Rohne. K tym wjelim tšojenjam na Njepilic dwórje w běgu lěta słuša teke „serbske burske blido“. Pśecej w měrcu su burja pjerwjej se hyšći raz zmakali, aby gromaźe se wulicowali a spiwali – slědny raz, nježlic se zachopijo to śěžke źěło na roli.

Na to burske blido jo pśišło wjele luźi, interesa jo była wjelika. Wšykne su pśišli we pšawem casu, pśeto wóno jo se pjerwjej rozpowědało, až fotograf Jürgen Maćij buźo pokazowaś swóje fotografije ze slěpjańskeje wósady z 1980tych lět. A na to su luźe napněte byli.

Ta historiska fotoekskursija jo wubuźiła wjele emocijow. A to pśedewšym dla tog, až na fotografijach jo było wjele luźi, kótarež źinsa wěcej njejsu žywe. Slěpjańska wósada – kaka jo wóna była pśed 30 lětami? Maćij jo Njepilic dwór fotografěrował poł lěta za tym, ako su te slědne wobydlarje wuśěgnuli. Kuchnja, groź – luźe su tam wjadli chudobne žywjenje.