Z Dolneje Łužyce/Niederlausitz. Wót soboty tyźeń a nejskerjej nanejmjenjej až do 15. januara płaśi w Bramborskej „mócny lockdown“. To zadora tomu, až móžo se w našych jsach ned zachopjeńk lěta rědna tradicija wótměś, to stare lěto „woklapaś“. Gmejnske zastupnistwo Bórkow jo se rozsuźiło, až zewšym njeplanuju woklapnicu w januarje. Kśě ako alternatiwu wobydlaŕsku zgromaźinu w nalěśu abo w lěśu pśewjasć, gaž situacija to dowólijo. Teke januarski termin žylojskeje woklapnice jo se dawno šmarnuł, tak jo pśedsedaŕstwo tamnego wobydlaŕskego towaristwa rozsuźiło. Lysann Rybakowa, wjednica górjańskeje Domowinskeje kupki, jo rowno tak zdźěliła, až na Górach njebuźo žedna woklapnica 2021 – a teke žeden zapust. „Smy pšašali pla strowotniskego amta we Baršću, a te su nam gronili, až to njebuźo móžno. Zapust wupadnjo.“ Glědajucy na napšawy pśeśiwo rozšyrjenja korony to drje wšuźi pla nas tak buźo – musymy se nejskerjej na nalěto mimo zapustowych pśeśěgow a rejow nastajiś, z kótarymiž smy pśecej tak wjasele tu zymu wugnali.