Z Města/Cottbus. Něnto jo tak daloko, až woblubowana zagronita redaktorka Marion Stenselowa swój 60. narodny źeń swěśi. To jo pśicyna, wěcej na jeje statki za serbske žywjenje dopomnjeś.

„Dobry źeń, lube pśisłucharje, witajśo k nam! How se pśizjawijo dypkownje dwanasćich połdnjo Bramborske serbske radijo wót rbb“. Tak zachopijo serbska rozgłosownica swójo wusćełanje. Swóje rumnosći ma we wusokem domu pśi Sprjewinej galeriji w Měsće. W swójej redakciji cujo se wóna ako doma. „How stojmy pśed mikrofonom a wusćełamy live. Za cas dowola sama cesto zaskócyjom. Howacej se koncentrěrujom na nawjedowanje teama, na planowanje redakciskego źěła a na zestajowanje programa. Som za to zagronita, až w redakciji wšo bźez wujśpjonka běžy.“