Z Města/Cottbus. Južo wót lětosnego nalěta jo se Šula za dolnoserbsku rěc a kulturu za to zajmowała wutwariś swójsku online-wucbu za dolnoserbsku rěc wuknjecych. Z teju platformu jo rěcna šula kśěła wósebnje młodych luźi dojśpiś a jich animěrowaś z modernymi srědkami serbsku rěc nawuknuś. Ale teke pśez koronu a z tym zwězanym pśetergnjenim prezentneje wucby jo teke notne wordowało, wucbu dalej wjasć ako distancnu wucbu.

Nejpózdźej pó prědnej žwale korony smy pó pórucenju ministaŕstwa za kubłanje, młoźinu a sport se do zwiska stajili z Paritetiskeju pśipomocu (Paritätisches Hilfswerk), aby dostali nowu digitalnu platformu za zwenkašulske kubłanje za dorosćonych. To jo pón wšo se raźiło.

Tak jo startował 27. oktobra 2020 prědny kurs z teju platformu, kótarejž se groni „Digitalcampus“. Ako ceptarja smy teke mógali dobyś jadnogo młodego, kenž jo rowno absolwent lipšćańskeje uniwersity.

Ned źaseś luźi jo se pśizjawiło a togodla smy musali źěliś jadnu kupku do dweju. Notne jo to teke było, pśeto kursisty su měli wšakoraki staw pśedznajobnosćow.