Z Města/Chóśebuz. Pópšawem jo to dejało byś rědny wjeliki serbski swěźeń, tak ako jo se stało 3. junija 1994 w Chóśebuzu. Tegdy su z wjelikim rušom wótwórili na Młyńskej droze w měsće Serbski muzej, a k tomu běšo z Pódstupima samo pśichwatał Manfred Stolpe, bramborski ministaŕski prezident.

Wušej 26 lět pózdźej su kśěli w Serbskem muzeju teke zasej pšawje swěśiś, gromaźe z młogimi luźimi głownje z Dolneje Łužyce. W juniju lěta 2016 ga běchu Serbski muzej zacynili, aby ceły historiski Lierschowy dom docełego saněrowali a zestajili a pśigótowali kradu nowu stawnu wustajeńcu. Tšochu dlej ako planowane jo to wšykno trało (ale nic tak dłujko ako twaŕ nowego lětanišća Barliń//Bramborska!). Ale pó wušej styri lětach jo něnto wšykno dogótowane. A ten jaden milion, ako su głownje za to wudali Załožba za serbski lud, město Chóśebuz a Žarjabnica Sprjewja-Nysa jo měł swój wužytk. Toś ten wažny a glucny źeń w nowem Serbskem muzeju – 27. oktobra 2020 – pak su musali jano w małkem krejzu dožywiś a swěśiś. Korona jo k tomu nuzowała.