Nowa šula we Gołkojcach akle 2023?

Až co wokrejs Sprjewja-Nysa twariś w gmejnje Gołkojce nowu cełkownu šulu, to jo wobzamknjona wěc. W njej dej raz wokoło 600 źowćow a gólcow wuknuś – wót sedymeje do dwanasteje rědownje. A chtož co, móžo tam teke pó dwanastej rědowni gótowaś abituru. Pópšawem su kśěli tam z wucbu zachopiś južo w šulskem lěśe 2022/23. To pak njedajo se realizěrowaś, a tak dej bys start za prědny sedymy lětnik akle w šulskem lěśe 2023/24. Z tym pak starjejše w Gołkojcach a we wokolinje wobjadne njejsu. Su togodla załožyli spěchowańske towaristwo, ako co se za to zasajźowaś, až mógu južo wót septembra 2022 tam wucyś. We wokrejsnem zastojnstwje w Baršću něnto pśemysluju wó tom, lěc by mógał prědny sedymy lětnik južo 2022 zachopiś wuknuś, a to nejpjerwjej raz w centrumje wušego schójźeńka kubłanja (Oberstufenzentrum), ako ma wokrejs SPN na droze Makarenka w měsće. Wó tom buźo grono dalej w bubłańskem wuběrku a ze starjejšymi.

Dwa miliona euro za digitalizaciju na šulach