Z Europy/Europa. 2011 jo FUEN (Federalistiska unija europskich narodnosćow) póstarcyła proces, źěk kótaremuž jo se do 2013 paket napšawow k šćitoju a k spěchowanju narodnych mjeńšynow w Europje „Minority SafePack“ wuwijał a EU-komisiji pśedpołožył. Ta njejo kśěła se z tym zaběraś, ale 2016 jo dostała sudniski pśikaz na to. Naslědku jo EU-komisija iniciatiwje „Minority SafePack“ lěto cas dała, aby pó cełej Europje milion pódpismow za swójo pśedewześe zběrała. To zběranje jo wuspěšne było: Wokoło 1,1 milion pódpismow jo iniciatiwa w januarje 2020 komisiji pśepódała. K tomu jo dejała 23. měrca byś debata w EU-parlamenśe. Korony dla jo se ta pśesunuła na 15. oktobra. Wóna jo se live do interneta pśenjasła.