Z Města/Cottbus. Njeglědajucy na njepśigódne wobstojnosći korony dla jo se dnja 8. oktobra 2020 pśewjadło tradicionelne woplěwanje zabijanja kokota na Dolnoserbskem gymnaziumje. Serbski nałog jo se swěśił w sportowej hali gymnaziuma, aby drugich wuknikow njemólili, kótarež njejsu směli pśiglědowaś.

Lětosa su źe druge pšawidła se kněžyli. Jano nowe rědownje, to groni pěty lětnik a nowej sedymej rědowni, a źasetkarje su směli pśi kokośe pśiglědowaś. Sportowa hala jo se do rozdźělnych wobceŕkow rozrědowała, tak až rědownje a lětniki njejsu měli mjazy sobu kontakt. Na zachopjeńku zarědowanja su „Anumarju“ rejowali a na kóńcu su koło teptali.

Kokot, kótaryž smy dostali ze Smogorjowa, jo se dupił na mě Hansi. Ale pśed wjelikim wustupom togo „cesnego gósća“ su se gólcy a źowća wuběźowali.