Wałtoru pśed jatšami na kjarchobje w Rownem w slěpjańskej wosaźe. We małej kapałce su se zmakali swójźbne, pśiswójźbne, pśijaśele, znate a susedy a dalšne wobydlarje ze jsy, aby se rozžognowali z lubym cłowjekom, kenž běšo 15. měrca pó śěžkej chórosći wumrěł. Paulo Šenkaŕ to jo, kenž jo dojśpił z wušej 88 lětami rědne, žognowane starstwo. Ale žeńska Roža, syn Miro, šwigerźowka Simone, enkelźowka Getka a z nimi wjele, wjele drugich by wjelgin, wjelgin glucne byli, gaby hyšći młoge dalšne lěta mógali z nim gromaźe žywe byś a se wjaseliś wšyknomu rědnemu na swěśe. To wjelike žycenje pak njejo se bóžko społniło...