Ze Slěpego/Schleife. Nimska jo ako zjadnośony kraj gano swěśiła swój 30. narodny źeń. Pśistup DDR k Zwězkowej republice ako tšojenje jo mjaztym cełu generaciju pšec wót nas. Weto su źowća a gólcy něnto na jawišću grali kus wó tom casu w slěpjańskej cerkwi, a su jen pokazali zachadny pětk. Dla koronowych napšawow jo jano 100 luźi směło do teje cerkwje, kuždy jo sejźeł z nagubkom.

Za tym źiwadłom stej stojałej Matthias Seidel a Ludwig Hetzel, ako jo zagronity za młoźinske źěło we cerkwinem wokrejsu Šlazyńska Górna Łužyca. W nadawku togo wokrejsa jo lichy režiser Matthias Seidel wuwijał ten kus z młodostnymi. Wón jo južo tśeśi raz něco wuźěłał z luźimi, ako su zwětšego ze slěpjańskeje młodeje wósady. Pśedłoni Mjertyn Luther był tema, łoni jubilej pśewrota w DDR.