Lipje/Leipe. Wótpołdnja, we casu, źož kafej a mlińce nejlěpjej šmekuju, jo 60 gósći se zejšło do Dubkowego młyna na Lipjem. Žeden stoł njejo wóstał prozny, Erich Budyšyn (Budischin) jo na akordeonje pśewóźował tu gósćinu pśi góźbje 125. narodnego dnja legendarnego góspodarja Dubkowego młyna Awgusta Końcaka. Wjele tych, ak su jogo hyšći póznali, su pśišli na njogo spominat a se wó njom rozgranjat.
A wetom jo se naraz zjawił ten mejstaŕ sam. Rozmjej, Manfred Kliche z Raduša jo grał Awgusta Końcaka – wón jo pśišeł „na urlop wót ceło górjejka“. Až do stupnego stwórtka jo měł pśiwdane dołoj stupiś na zemju a se rozglědaś, chto hyšći se na njogo mysli, chto jo pśišeł na jogo zakopowanje (1974) a chto nic. Kliche jo Awgusta wósobinski znał a ceło pó jogo wizy jo kuždego a wšo „pśecesał“.
Awgust Końcak jo był daloko a šyroko znaty, dokulaž jo cesto pśeśiwo pśedpismam, kaznjam a wustajenjam swójo njezdaśe wugronił. Wón jo se myslił a cynił wšo za swójim rozymom, což jo za pšawe měł. Samo wót hygieny jo měł swóje myslenja.