Wu nas su luźe we februarje mógali dožywiś něco wósebnego: We Hochozy jo póbyła šamanka Aayla. Bydliła jo wóna w domje jadneje swójich wuknicow. Seminary a work-shopy jo pśedwjadła we Hochozy, Turjeju, Mósće a Chóśebuzu. Tam jo někak 30 luźi pśišło, na seminary 20 luźi. Na tych dnjach su pśišli luźe ze swójimi pšašanjami. Pśisamem wše su byli z Hochoze a wokolnych jsow. Wušej togo jo jaden wjacor był „běg pśez wogeń“. Luźe su toś gnali pó žaglecych wuglach. To dej žywjenje luźi wulichowaś wót njegluki a njedarow, wušej togo móc daś za realizaciju žycenjow a prědkwześow. Na to jo pśišło 20 luźi, na swěźeń pśi tom su wejsanarje pśichwatali – wóni su słyšali bubony a kśěli wěźeś, což se stawa. Na kóńcoma tyźenja jo był seminar „Móc prědownikow“ (Kraft der Ahnen) we dwěma źěloma. Tyźeń dłujko jo Aayla wjadła luźi pó drogach šamanskeje wědy a wěry. To jo kompleksny system ritualow a myslenjow. Zapšawym, jo Casnikoju groniła Aayla, jo šamanizm kultura. Ako nabožninu wóna jen njerozmějo a teke njepyta za konfrontaciju z nabožninami. To jo skěrjej wěsta wašnja, swět wiźeś.