Stefanie Krawcojc: Gregor, sy wót septembra pśistajony redaktor pla Serbskego rozgłosa rbb, nic ga?

Gregor Kliem: Jo. Som redaktor za muziku a kulturu, naslědnik Ulricha Pogody. Som źěłał za Serbski rozgłos wót 2013, ako lichy awtor. 2019 som lětko pśewzeł redaktorske městno koleginy, kótaraž jo była w maśerinem casu.

A ceji sy?

Som 29 lět stary a bydlim w Chóśebuzu z familiju. Póchadam z Dešna, wót Tyšaric dwóra. Som študěrował muzikologiju a etnologiju w Lipsku, Ljubljanje a Halle.

Co jo se za Tebje změniło?

Ako pśistajony redaktor maš wěcej zagronitosćow, za wopśimjeśe a za pšawosć. Móžnosći su wětše, sam aktiwny wordowaś a wěcej na nogi stajiś. Dejš póstajiś, do kakego směra program dej se wuwijaś.

Co su twóje nadawki?

Mamy wšedne wusćełanja, ja rozsuźijom kaku muziku grajomy, zestajam muzikowe programy a glědam na pšawu měšańcu. Serbski rozgłos ma pśisłucharjow wót 0-100 lět, za kuždego dej něco pódla byś.

Dejš se ako redaktor „jano“ wó muziku a kulturu staraś?

Ně. Moderěrujom, pśigótujom pśinoski abo wusćełanje a zagronijom raz jaden tyźeń a druge wěcy.

Kake su twóje fawority?