Komentar k „Wokrejs LDS co pśistupiś Domowinje“ z NC 39/71: Ptaškowa swajźba jo w Dolnej Łužycy woblubowany nałog za źiśi. Rownož njepóchada wót how, jo w źiśownjach, zakładnych šulach a hortach wjelgin derje pśiwzety. Rowno to płaśi tek za to wjelicke zarědowanje Serbskego ludowego ansambla w chóśebuskej měsćańskej hali. Kužde lěto pójědu ze źiśownjow a šulow tam z busami a napołniju ten wjelicki zal. Za te źiśi njejo to jano rědny wulět a wósebne dožywjenje. Ale wažny aha-efekt jo, až dajo tak wjele źiśi, kenž wuknu serbsku rěc. Južo dla togo su take wjelicke zmakanja kradu wužytne.