Z Wórjejc/Hoyerswerda. Pětk tyźeń su w Kulturnej fabrice we Wórjejcach jadnu seś załožyli, ako co lokalne aktery Dolneje a Górneje Łužyce ze wšakimi ekspertizami a kreatiwnymi mócami w casach strukturneje změny zwězaś, aby wóni se wuměnjaś mógli a widobne byli w zmysle politiskego modela wobźělenja bergarjow. Tej seśi se groni „Bergaŕski region Łužyca“ („Bürgerregion Lausitz“). To jo wuslědk pśemyslenjow, z kótarymiž su se zastupniki wšakich ciwilnotowarišnostnych organizacijow z Bramborskeje a Sakskeje w slědnych dwanasćo mjasecach zgromadnje zaběrali. Glědajucy na wobzamknjone wótstupjenje wót wudobywanja brunice ma toś ta iniciatiwna kupka załoženje „Bergaŕskego regiona Łužyca“ za wažny kšac do pśichoda. Měnje, až bergaŕki a bergarje su nejwažnjejša móc, aby strukturna změna w našom regionje se wuspěšnje zmejstrowała. Pśez tu seś móžo jaden wót drugego wuknuś a se inspirěrowaś daś za lokalne statkowanje na wšakich pólach.