Wótlěwa: Ruth Veltenowa (bariton saksofon), Rico Wolf (tenor saksofon), Miriam Dirrojc (alt saksofon), Gerold Gnausch (sopran saksofon) a Walburga Wałdźic (spiwanje) graju pśi Muzeju Wernera Berga. 
Z Pliberka/Bleiburg. Wuměłc a korutański Słowjeńc Karl Vouk jo iniciěrował wósebny tśi-krajowy projekt, na kótaremž se wobźěliju wót 2019 do 2021 wuměłce a wuměłcowki, muzeje a kulturne institucije z Awstriskeje (z Korutańskeje), Nimskeje (z Łužyce) a Słowjeńskeje. Ze srědkami kultury a rěcy – nimskeje, słowjeńskeje, górnoserbskeje a dolnoserbskeje – wopytajo projekt, granice pśestupujuce krajiny pśedstajiś. Stakim jo teke titel projekta styrirěcny: „WOBRAZY KRAJINY. PODOBE POKRAJINE. BILDER EINER LANDSCHAFT. WOBRAZE KRAJINY. Přechod. Prehod. Übergang. Pśechod 03“.
Projekt jo dalejpóranje pitśku wusnjoneg zgromadneg źěła mjaz Słowjeńcami a Serbami. Karl Vouk jo južo 2014 iniciěrował Dny serbskeje kultury w Korutańskej. Ze zachadnosći znate su teke proce słowjeńskego publicista Leopolda Lénarda (1876-1962) k pśibliženju teju ludowu. W Ljubljanje jo było w prědnej połojcy 20. stolěśa aktiwne towaristwo pśijaśelow Serbow.
