Z Bórkow/Burg. „Pśed ,Schoberhut‘ se zběraju tšojeńka, ideje a fakty, togodla se góźi mě ,Stog‘ za domowniski lětopis togo regiona“, tak jo to něga ten mjaztym zemrěty bórkojski šołta Martin Schmidt naraźił. Radochlojc Rolf a Edeltraud z Rubyna stej to pórucenje pśewzełej, stej dałej swójomu „góle“, błośańskemu domowniskemu kalenderoju, kenž jo pód jeju režiju 2005 prědny raz se wózjawił, mě „Stog“.

Tradicionelnje jo teke lětosa k casoju Domowniskego a drastwinego swěźenja w Bórkowach nowy „Stog“ wujšeł, mjaztym ten sedymnasty, za kótaryž jo dogromady 41 awtorow, mólarjow a ilustratorow pśinosowało. Iniciatora stej mjaztym sobuwójowarjow namakałej, kótarež su se w Spěchowańskem towaristwje „Heimatgeschichte ,Stog‘ e.V.“ zjadnośili.

Rolf Radochla, pśedsedaŕ togo towaristwa, kenž jo akle mało dnjow do togo swój 70. narodny źeń z wjele wuměłcowymi pśijaśelami swěśił, jo pětk tyźeń 17. wudaśe ,Stoga‘ na bórkojskem swětosnem jawišću prezentěrował, a jo młogich awtorow a młoge awtorki na jawišćo pšosył.