Z Běłeje Góry/Byhleguhre. Juž 16. awgusta su tudy zaswěśili nowu mlokowu ławu. Słyńcko jo swěśiło, hochoska kapała „Drachen-Combo“ jo grała a Běłogórjańske su se pórali na swěźeń srjejź jsy. Zawěsće su glědali na póstajenja korona-pandemije dla, weto su źiśi se wuběžowali a drjewjanu krowu „dojli“, wše su se pjacone prose zesłoźeś dali a se wulicowali wót wejsneg žywjenja „pjerwjej“.
Mlokowe ławy su pjerwjej słušali ku jsam, teke w Běłej Górje. Gaž su krowy byli wudojte, su luźe to mloko zajtša rano w kanach dowjadli na te ławy, z kólasami. Wóttam jo kónjowy spśěg wótholił te kany a jo z nimi jěł do mlokaŕnje we Tšupcu, pózdźej su to z traktorom wobstarali. Aby spóznali, ceje te kany su, jo mlokaŕnja dała kuždej familiji wósebny numer, ako su luźam pisali na swóju kanu. Za tym, kak tucne to mloko jo było, su luźe dostali to mloko zapłaśone.