We mjenju zagronitego za nastupnosći Serbow w Bramborskej, statnego sekretarja Martina Gorholta jo powědał jogo referent Měto Nowak. Wón jo chwalił wuspěchy a raźenja Domowinskego źěła, wósebnje to cesnoamtske źěło. Angažement pśi wuzwólowanju Serbskeje rady jo pokazał, až „maśo demokratisku legitimaciju wašogo zastupnistwa serbskich zajmow za wažnu“. Kulturne źěło cłonkow jo pokazało, až serbske nałogi, ak mjaztym słušaju k imaterielnemu kulturnemu derbstu UNESCO, njejsu jano folklora, ale źěl žyweje kultury. Cłonki nałožuju wjele casa za intensiwne pśeznanjowanje komunalnych politikarjow – a to jo se zadaniło: w Łukojcach, Lubinje, Kalawje, Hažowje a Wjelikich Dobrynjach budu gmejny gromaźe ze serbskimi luźimi póžedanje za pśistupjenim do sedleńskego ruma stajiś – jo Nowak wuzwignuł.