Z Pódstupima/Potsdam. Serbska akciska seś jo wugódnośiła 27. julija aktualny staw serbskorěcnych internetowych prezencow serbskich institucijow, zwězkow ako teke statnych institucijow. Znatecynjenje buźo na webboce RCW.

Tak jo akciska seś zwěsćiła, až jano źaseś institucijow ma pak serbskorěcnu pak měšanu serbsko-nimskorěcnu webdomenu. Źiśecy a wuknjeński dom „Lipa“ w Bórkowach pórucyjo na pśikład měšanu rěc webdomeny.

Startowy bok w serbskej rěcy póbituju na pśikład Serbski institut z. t., LND (k tomu Nowy Casnik), Załožba za serbski lud abo Serbska wósada. Domowina z. t. póbitujo na pśikład wuzwólenje rěcy startowego boka. Rbb (serbski program) pórucyjo dwójorěcny startowy bok. Dolnoserbski gymnazium ma serbski startowy bok z nimskimi elementami. Serbska zakładna šula „Krabat“ w Janšojcach ma dwójorěcne menijowe wjeźenje pó webboce.