Z Engelskeje/England. Tuchylu slěźi 27lětna dr. Kathrin Hipkojc (Hiepko) z Manchestera za zwuconosćami wužywarjow Serbskeje centralneje biblioteki w Budyšynje. Dokulaž jo wóna serbskego póchada, jo kśěła se do serbskego swěta pšawje zanuriś. Jeje starki tśeśego naroda jo se naroźił 1892 w Baršću/Forst. Jogo familija jo póchadała spócetnje z Jemjelice/Jämlitz. Wón pak jo musał pśeśěgnuś ze swójeju familiju do Quedlinburga dla pówołanja jogo nana, toś njejo nejskerjej serbski powědał. Jeje starki a jogo familija pak stej pó Drugej swětowej wójnje bydliłej w Zwězkowej republice Nimska.

Slědne lěta jo se Kathrin wěcej z familijoweju historiju zaběrała. Jeje familijowe mě jo se zwětšego pisało „Hiepko“ abo „Hiepkow“. Zajmne jo, až jo se Hipkowym groniło w 18. stolěśu „Budarjowe“.

„Južo ako góle som wědobna była, až som serbskego póchada. Togodla som we wušem schójźeńku napisała referat wó žywjenju Serbow mjazy 1949 a 1989. Aby daty za to dostała, som wótleśeła 2010 do Nimskeje a som woglědała tam Serbsku biblioteku, SKI a SI ako teke Smolerojc knigłaŕnju“, wulicujo Kathrin Hipkojc.