Ze Strjažowa/Striesow. Na wótwórjenju ferijoweje idyle Sprjewinego ługa na kšomje Strjažowa jo był wjeliki wótgłos. Něźi 600 narskich jo pśišło woglědat k tym gruntam Carstena Gründera, wjelikim 3.600 kwadratnych mejtarjow. Carsten Gründer jo do togo był znaty jano ako woblubowany šef tamneje pótwaŕskeje firmy.

„Mója śicha zapalonosć jo pśecej było wobźěłanje drjewa. We mnjo jo juž dłujko zdrjało žycenje, něco wětšego z toś teju surowiznu wuźěłaś. Slědny póstark jo dał 2009 mój woglěd jadnogo kursa wó bolanych domach w Carnej góli (Schwarzwald). Wót togo casa jo mě było jasne, až budu na gruntach, kótarež som kupił, drjewjane domcyki twariś“, jo wulicył drjewowy mejstaŕ. Zgromadnje z jadnym wót jogo pótwarjarjow jo zachopił pśed tśimi lětami prědny dom na swójich gruntach twariś, aby pšawje wóznamjenjone štomy pózdźej na susednych gruntach stajiś mógał.