W Drastwinem domje Jatzwauk we Wórjejcach su teke młoge sceny za film „Sprachlos? Sorben im Nationalsozialismus“ wjerśeli. How wiźimy screenshot, kenž pokazujo Ellu Haukojc (Hauke), kótaraž chójźi na šulu „Johanneum“ we Wórjejcach. 
Z Wórjejc/Hoyerswerda. Za krotkofilm „Zmij – Der Drache“ jo filmaŕka Angela Šusterowa na Łužyskej filmowej pśeglědce 2016 głowne myto dostała. Ten film, kenž pokazujo serbske źowćo w casu NS-diktatury, ako sebje plona žycy, jo wjeliki zajm a wjele chwalbow wubuźił. A ta tematika jo Angelu Šusterowu teke dalej zaběrała. Łoni jo wóna w ramiku projekta „Spurensuche“ gromaźe z wórjejskimi wuknikami a wuknicami wjerśeła dokumentariski film „Sprachlos? Sorben im Nationalsozialismus“. Ten jo teke zapódała za lětosnu Łužysku filmowu pśeglědku.
Tematika, ako ju pśewóźujo
Starjejšej tśeśego naroda (Urgroßeltern) 48lětneje Angele Šusteroweje stej hyšći serbsku rěc powědałej – ale pśez to, až ta rěc jo w casu NS-režima zakazana była, stej wopśestałej, ju powědaś, a njejstej ju pśiducej generaciji dalej dałej. Stej bydliłej we Běłem Chołmcu (Weißkollm), źož jo teke Angela Šusterowa wótrosła (źinsa wóna bydli změstymi w Běłem Chołmcu a změstymi we Wórjejcach). Wjele casa jo pśebyła pla starjejšeju tśeśego naroda.
