Tak ako wšykne serbske institucije su se musali w redakciji Bramborskego serbskego radija w Chóśebuzu w slědnych styri mjasecach bejnje běźiś z koronu. A to gótujo jim teke dalej to žywjenje a to źěło śěžko. Kak su to dotychměst wšykno zwónoźeli, co su musali hynac cyniś a kak to dalej pójźo – wó tom jo se Horst Adam rozgranjał z Marion Stenseloweju, ako nawjedujo južo wjele lět tu serbsku redakciju rbb.

Jo był ten tšach wjeliki, až ten program w dolnoserbskej rěcy w rozgłosu rbb wupadnjo dla korony?

Ně, tak daloko njejo pśišło. My pak smy wó tom pśemyslili a se teke na to pśigótowali, co buźomy pón cyniś, gaž muse wšykne redaktory a reportarje do kwaranteny. Pón by měli weto pśisłuchaŕki a pśisłucharje kuždy źeń swóju serbsku góźinku w radiju a to se wě, teke njeźelu. By pón wusćełali na pśikład starše programy, koncerty, muziku. To aktualne pak bóžko njeby móžno było. K tomu na gluku njejo pśišło! Kuždy źeń su w radiju zazněli serbske słowa a serbska muzika.