Ze Slěpego/Schleife. Pśed dwanasćo lětami jo se wótzamknuło dogrono mjazy gmejnu Slěpe a Vattenfallom (Slěpjańske dogrono 2008) k zarownanju pó wótwórjonej jamje Wochozy/Nochten a ku komunalnemu wuwiśu. Slědny tyźeń wałtoru jo slěpjańska gmejnska rada na pósejźenju facit śěgnuła, až toś to dogrono jo se we wjelikej měrje dopołniło. Wětšyna z dwěma „ně“-głosoma jo toś to zwěsćenje wobzamknuła.

Dla nowego rewěrowego koncepta LEAG wót 2017 njejo móžno było, až wšyknym 2008 z Vattenfall Europe Mining AG dojadnanym dypkam se zacasa docynijo. Ako dopołnjone płaśe mjazy drugimi slědujuce dypki: Nowo-twaŕ Nimsko-serbskego šulskego kompleksa, twaŕ Socialnego centruma z najmaŕskimi bydlenjami za seniory a zbrašne, saněrowanje slěpjańskeje cerkwje a zarownański fond za pśesedlarje.

Wušej wóstanjo plan wužywanja płoni, rozglědanišćo a šćit pśeśiwo zogoloju a prochoju. Toś te pśedewześa se pśigótuju. Wóni wóstanu wobstawna tema, ako jo šołta Reinhard Bork pódšmarnuł.