Z Bórkow/Burg. Bórkojske turistikarje njejsu se z rozsudom lažko měli. Wóni su weto tradicionelne wiki rucnikarjow a burow pśewjadli. Na kóńcu wobeju wikowańskeju dnjowu slědny kóńc tyźenja jo Nicole Schlengerowa, wjednica turistiskeje informacije Bórkowy, wobkšuśiła, až rozsud jo dobry był: „Naše woglědarje su se źaržali na hygienowe a wótstawkowe pšawidła. Rucnikarje a bury su byli spokojom z woglědom a z tym, což su pśedawali.“
Wjele tradicionelnych póbitowarjow jo było pódla. A k trajnym wobźělnikam na tych wikach słuša na pśikład Arnold Klähr z Wětošowa. Wón jo pokazał, kak nastanu drjewowe dołki (Holzmulden) a jo je pón teke pśedał, rowno tak ako wjelike kuchniske delki, drjewjane łžyce a wjele dalšnego, což móžoš z togo pśirodnego materiala guslowaś.
Młody pśedewześaŕ Benjamin Illing z Města jo póbitował mydła, kenž wón sam z regionalnych pśicynkow zgótujo. „Jo rědnjej, gaž móžoš na wikach byś, z kupcami tam do rozgrona pśiś. Take něco njejo dało w zachadnych mjasecach. Toś som wjasoły był, až mam teke online-shop“, jo młody luź wulicował.