Z Barlinja/Berlin. Za tym, až jo se w slědnych lětźasetkach 137 jsow w serbskem sedleńskem rumje wótbagrowało za statnu energijowu politiku, dajo něnto znamje, až Nimska w zwisku z wótstupowanim wót wugla skóńcnje pśewzejo zagronitosć za serbsku mjeńšynu. Pětk tyźeń jo rozmjej Nimski zwězkowy sejm gromaźe z wótstupowanim wót wugla teke wobzamkuł „Kazń k zmócnjenju struktury wuglowych regionow“ („Strukturstärkungsgesetz Kohleregionen“), źož stoj w paragrafje 17 pód dypkom 3, až „napšawy k spěchowanju wobchowanja a dalejwuwiśa rěcy, kultury a tradicijow serbskego luda ako narodna mjeńšyna“ k programam a iniciatiwam Nimskeje pśi strukturnej změnje w doněntejšnych górnistwowych regionach pśisłušaju. K wobtwarźenju togo zaměra „wujasnjujo zwězk, až teke nastupnosći serbskeje mjeńšyny su spěchowanja gódne.“