Lube źiśi,

kak se Wam źo? Co buźośo cyniś we ferijach? Smy hyšći w casu korona-pandemije. Weto su wšake wěcy zasej dowólone. Cirkus jo na pśikład zasej dowólony. Glědamy raz, ga artisty, klowny a zwěrjeta budu nas zasej rozwjaseliś!

Ja mógu Wam jano klowny na fotach pokazaś. To su luštne bildki! Z nimskego cirkusa pak njejsu te fota. Ale klowny su z Nimskeje. Wóni su doleśeli do Kambodže, do města Siem Reap. Towaristwo „Klowny bźez granicow“ jo to organizěrowało. To towaristwo ma cel, źiśam wjasele a smjejkotanje pśipóraś, ako su žywe w krizowych stronach swěta.

Teke Kambodža jo krizowy stat. Kambodža, to jo kraj w Aziskej. Dłujke lěta su how Cerwjene Khmer kněžyli. Wóni njejsu luźam dobre byli, ale su je terorizěrowali. Luźe how su chude. Až źiśi mógu šulsku wucbu wótzamknuś, se njerozmějo wót samego. W Siem Reap jo centrum „Kaliyan Mith“. Tam wuce źiśi a kubłaju młodostnych. Na pśikład mógu tam wuknuś na šlodarja abo frizerku.