Z Města/Chóśebuz. Wót 25. maja jo Statny šulski amt Chóśebuz źěl projektowych sobuźěłaśeŕkow ze Źěłanišća za serbske kubłańske wuwijanje (ABC) wótśěgnuł, aby se na Dolnoserbskem gymnaziumje mjazy drugim kupkowa wucba w nimšćinje a engelšćinje zawěsćiła. MBJS jo tomu až do kóńca šulskego lěta pśigłosował. „To njejo było daniž pśigótowane a wótgłosowane z wobźělonymi, daniž jo se kšac pó §132 (2) Bramborskeje šulskeje kazni (BbgSchulG) pśespytował“, groni wjednica ABC, dr. Christiana Piniekowa na napšašowanje. ABC su dowěrjone nadregionalne nadawki we wobłuku serbskeje wucby. Jaden centralny nadawk jo wuwijanje a wudawanje wucbnych a wuceńskich srědkow. 40% projektowego źěła se tuchylu dalej pśewjasć njamóžo, dalšne źěłowe a planowańske procese su wobgrozone. Njezjapki pśetergnjona jo natwaŕ online-platformy, na kótarejž deje se digitalnje wucbne materiale za ceptaŕki a ceptarjow serbšćiny a bilingualneje wucby k dispoziciji stajiś. Dalšnej wažnej projekta z kooperaciskimi partnerjami stej wobgrozonej.