Z Města/Cottbus. Na zachopjeńku lěta jo plan Serbskego muzeja w Chóśebuzu hyšći tak wuglědał, až w drugem kwartalu togo lěta wótwóriju. Dla korona-situacije to pak njejsu mógli realizěrowaś. Źěło w tom domje dalej běžy, na wustajeńcowych rumach se nadalej twari. „Rucnikarje, architekty a grafikarje tam hyšći zabrane su, a to hyšći trajo“, groni Martina Nowakojc, tamna kuratorka, ako za tu wustajeńcu zagronita jo. Na jaden part jo tak, až jo pśi tych twarjenjach korony dla k wótwlekanjam pśišło, na drugi part: Teke, gaby wóni tam gótowe byli, njeby tuchylu směli žedno wótwórjeńske zarědowanje pśewjasć. A to, ako Nowakojc groni, jo druga pśicyna, až to hyšći njeklapujo, pśeto wóni ga se žyce wótwórjenje muzeja z dostojnym zarědowanim. Naźejaju se, až to w stwórtem kwartalu, to groni w nazymje, klapowaś buźo.