Z Bórkow/Burg. Wótwórjenje wósebneje wustajeńce w Bórkojskej domowniskej śpě jo było kradu śiche. Jeje titel jo „Mójo nejrědnjejše rucne źěło“ a nawězujo direktnje na minjonu wustajeńcu „Drastwine źěle wušyte z nitkow“.

„Woglědarje slědneje wósebneje wustajeńce su mě rozpšawili, až wóni teke wušywaju, źeju, kokulkuju, tkaju, wjele z rukoma zgótuju. To jo mě k ideji něntejšneje zestawy wjadło“, groni wjednica domowniskeje śpy Bärbel Šubertowa. Wóna jo zawcasa zachopiła, informacije wó samo zgótowjonych rucnych źěłach zapisowaś. Cełe knigły su nastali z informacijami wó źěle a wó technice, z kótarejuž su wugótowane, wó tom, chto jo je wugótował a kake tšojenje jich zwěžo. Dogromady pokažo se 70 objektow wót 49 wugótowarjow. „Zestajanje wustajeńce njejo było lažke, dokulaž wjele póbitowarjow, kótarež som pśepšosyła, njejo se mógło rozsuźiś, kótare jich nejrědnjejše rucne źěło jo. Někotare su cełu połnu kistu pśinjasli. Aby njeměli drěcynu pśi wuzwólenju, som se pominała rozsud wót wšych“, rozkładujo muzeumowa šefowka.