Wobźělniki serbskego online-kursa (via skype) wót ceptaŕki Colett Šampatisoweje su jadnučke pśi Šuli za dolnoserbsku rěc a kulturu, kótarychž kurs jo mógał njeźiwajucy na koronu dalej běžaś. Wót zachadnego tyźenja jo se teke jaden drugi skype-kurs z njeju zachopił. Mimo togo jo Colett sobu pomagała, až jo rěcna šula mógła na swój internetowy bok teke appy ze zwucowanjami k dolnoserbskej rěcy stajiś. Foto: Michael Šampatis 
Z Města/Cottbus. Pó kazni za zagaśenje korony w Bramborskej wót 13. měrca njesměju Ludowe wusoke šule a druge kubłańske zwenkašulske institucije źěłaś. To groni konkretnje, až w rumnosćach chóśebuskeje rěcneje šule a w serbskem sedleńskem rumje žedne zarědowanja a kurse se njewótměju. Nalětny semester jo se zachopił južo w februarje a skóro wšykne rěcne kurse su něnto we-srjejź pśetergnjone. W toś tej situaciji jo dało wokognuśa cakanja a pśemyslowanja kak dalej, pśeto nichten njejo wěźeł, kak dłujko to trajo.
Ale sobuźěłaśeŕki rěcneje šule su sebje wěste byli, až tak lažko njebuźo šula do stojanja pśiś, pśeto južo woblubowanej zarědowani „Serbskego wótpołdnja“ a jězd do Pólskeje stej musałej wupadnuś korony dla. Nejžpjerwjej k jatšam su wšykne aktiwne wobźělniki rěcnych kursow dostali jatšowne póstrowy wót šule, zwězane z małymi rěcnymi nadawkami.
