Ze Žylowa/Sielow. Njeźelu wjacor su byli žylowarje pśepšosone na pśednaměsto tamneje cerkwje, ako jo tam hyšći raz měšany pozawnowy chor Strjažow, Dešno a Žylow koncert organizěrował. Toś ten pozawnowy koncert jo był iniciěrowany zasej wót dłujkolětnego chorowego dirigenta Thomas Giese, z kótarymž smy se krotko rozgranjali.

Kněz Giese, my mógali gódaś, až toś te koncerty su byli wót tudejšeje faraŕki Köhleroweje, insceněrowane. Wót njeje som zgónił něnt, až sćo Wy pśed tyźenjami ten iniciator byli.

No jo, swóje ideje som z faraŕku Köhleroweju wótgłosował. Ale wóna jo ned reagěrowała ze zapalonosću, ako som jej wó tej ideji wulicował.

Kótara ideja jo to była dokradnje?

Som měnjecy był, až dejmy luźi dopomnjeś w někakej formje, až hyšći dajo cerkwju mimo abstinence z bóžeje słužby w toś tom krizowem casu. A togodla som kśěł z mało słowami jadnorje muziku zagraś daś. To jo była ideja, z kótarejuž smy wustupili w jatšownem casu prědny raz.

Wócywidnje z wuspěchom, dokulaž licba woglědarjow jo to wobkšuśiła.