Z Dešna a Smogorja/Dissen und Schmogrow. Jo pla nas rědna tradicija, až pśedwjacor prědnego maja abo prědny maj se stajaju wupyšnjone majske bomy. Lětosa pak – dla póstajenjow pśeśiwo rozšyrjenjeju korony – su tuchylu wjelike zmakanja a akcije ako k stajenju bomow z chórgojami a bantami a z brjazu górjejce zakazane.
Někotare šybałe głowki weto njejsu kśěli zbyś se teje gjardosći a wjasołosći, ako stej z tradiciju majskego boma zwězanej. W Dešnje jo pśecej jadna familija za stajenje wupyšnjonych bomow zagronita. A te, kótarež su ten nadawk tenraz měli na starosći, su se cele śicho, mimo pśiglědarjow, do źěła dali. Lětosny majski bom njejo se jano ze serbskeju chórgoju wupyšnił, ale teke z pisaneju toflu pśed sobu.