Ze Žylowa/Sielow. Južo wót někotarych mjasecow jo kupka angažěrowanych Žylowarjow se do pśigótowanjow 720-lětnego jubileja něgajšneje jsy w pódpołnocy Chóśebuza dała. Nic tak wjelicki ako pśed 20 lětami pśi kulowatem jubileju su ten swěźeń kśěli měś, weto su dejali te za to wubrane tśi dny prědnego septemberskego kóńca tyźenja 2020 byś rědny ludowy swěźeń za kuždego.
Swěźeń za wšyknych a ze wšyknymi su organizatory na planje měli, togodla su rozdźělili na wšykne domacnosći informaciske cedliki, na kótarychž su nalicyli planowane zarědowanja. Su pak teke wuwołali k sobugótowanju. „Cośo-li byś źěl našogo gromadnego swěźenja, pón pśizjawijośo se pšosym pśi organizatorach,“ jo był ten tamny apel.
Mjaztym jo pak wšykno cele hynac. Južo zachopjeńk apryla jo musało nalětne rěšenje w Zylowje wupadnuś, a dawjeto jo wustajenje krajnego kněžaŕstwa wjelike zarědowanja nanejmjenjej až do kóńca awgusta zakazało.