Z Błotow/Spreewald. Cesto wóstanjo póglěd wobglědarja – gaž twarjenje se wobglědujo – pśi dymnicy „wisecy“. Žeden źiw to w błośańskich stronach njejo, źož ga dajo kopicu wšakich architektoniskich wósebnosćow na kšywach. To jo teke sobu zawinował pórěd policije za gasenje wognja (Feuer-Polizei-Lösch-Ordnung) wót 1. junija 1860 w Bórkowach.

Drje žednej jadnotliwosći pśi twarjenju doma se teliko zajmowanosći a dokradnosći pśichyla kaž tym dymnicam. A to z dobreju pšawu, pśeto lisćina wótpalonych jsow a městow dla defektnych abo wobuł natwarjonych dymnicow jo we tom regionje dłujka. Wósebnje tegdy, ako te bydleńske chromy a groźi su hyšći ze sćinu pókšyte byli, jo tšachota wognja była wjelika.

Źinsa móžomy se lěbda hyšći pśedstajiś, až dymnice a kaminy raz samo su se z drjewjanych delkow zgótowali abo až su z drjewjaneju wězbu (Dachstuhl) techniski zwězane byli. Jano śańkučka warstwa gliny abo kalka, kótaruž su na nutśikownu stronu delkow pómazali, jo dejała tšachotu wognja pśez górcotu a lětajuce škricki pitśku znižyś.