Pśed lětom 1990 jo měł kuždy nimski stat dwa statnej swěźenja. W pódwjacornem stej to byłej 17. junij a 1. maj, w pódzajtšnem 7. oktober a 1. maj. Ten źeń su swěśili w Nimskej prědny raz na iniciatiwu SPD w lěśe 1919.

W NDR su na tom dnju w zawodach źěłaśerje za dobre źěło abo za politiske procowanje pócesćili. To jo se zwězało zwětšego ze swěźeńskeju góźinu. Źiśi su pyšnili swóje šule a źiśownje z pisanymi chórgojckami a wobrazami. Te su pokazali kwětki, chórgoje cełego swěta a gołubu měra, dokulaž 1. maj jo płaśił ako mjazynarodny wójowański a swěźeński źeń źěłaśeŕskeje klase za měr a socializm.

W městach a wjelikich jsach su byli demonstracije, wótergi wjacor reja. Na demonstracijach su se zgromaźili luźe wšych powołanjow a generacijow. Pśi tom su źiśi pokazali zasej gołub měra, dorosćone transparenty z parolami, chórgoje politiskich stronow a masowych organizacijow, wósebnje pak narodnu NDRsku a cerwjenu. Taka jo z casa stawka waliziskich górnikarjow w lěśe 1831 znamje źěłaśeŕskego gibanja.