Z Bórkow/Burg. Srjodu tyźeń jo se wótměła zgromaźina gmejnskich zastupnikow amta Bórkowy, tež młoge wobydlarje su pśibytne byli a sobu diskutěrowali. Aby mógli wótstawkowe pšawidła doźaržaś, su se w awli šule „Mina Witkojc“ zmakali. Wažna tema jo była planowanje noweje wěcejzaměroweje hale. Su wó wšakich wariantach diskutěrowali. A ten nejwětšy konsens dajo how: Až se twari na městnje stareje turnowaŕnje slězy šule, pśi comž ta twaŕ se pitśku wjerśeś dej, tak až zwězanje (ako móst) ku kurowemu parkoju pśiscyniś mógu. W kurowem parku pón by mógli hyšći mały centrum zarědowanjow wugótowaś, ale rowno to jo nadalej pśedmjat diskusije. Gmejnske zastupniki se hyšći póraźowaś kśě. Finalny rozsud dej slědowaś na pśiducej zgromaźinje 6. maja.