Ze Strjažowa/Striesow. Te tśi nowe bolane wjažki za turisty , ako stoje na kóńcu jsy ku Prjawozu, su gótowe. Jich wobsednikaŕ Carsten Gründer jo měł to wótglědanje, slědny kóńc tyźenja prědne gósći tam powitaś. Dla korona-krize pak buźo se zachopjeńk sezony wótstarcyś. Wón caka njesćerpnje na to, až ten zakaz turizma se zasej wótpórajo. Pśeto prědne gósći su južo pśipowěźone.

Na wrotach wita śi napismo „Ferienidyll zur Spreeaue“, a slězy nich cakatej na gósći dwě nowućkej wjažy z ferijowym bydlenim: „Gólny duch“ a „Šytawa“. We kuždej namakajo se město za styri abo pěś paršonow a wjelika kuchnja a kupadło. Pódla njeju stoj tśeśa wjaža, ak se góźi za swěźenje, gósćiny a zgromaźiny. A jadna dalšna k bydlenju buźo se hyšći twariś.

Gósće namakaju drogu k njomu pśez turistiske portale a pśez jogo samsku internetowu prezentaciju. Teke we turistiskej informaciji w Radušu zgóniju woglědarje wót teje noweje móžnosći wótpócywanja a pśebytka w našych stronach.

Za togo góspodarja jo to drugi słup jogo góspodaŕstwa. Wón ma wacej we jsy firmu, ako twari rystungi.

*