Jubilejne burstakarje, kótarymž jo „to serske“ na wu-tšobje lažało, njejsu zabyte luźe. Wóni su styrjo, te stolětniki (pó pisnej rěcy), kenž by lětos hundert wordowali (tak zni to na jsy): jaden našych pólskich pśijaśelow, jaden znaty a lubowany serbski faraŕ, jaden sławny (górno)serbski literat a jaden wšoserbski wědomnostnik.
Wylem Szewczyk
Pólski wědomnostnik, literarny historikaŕ a spisowaśel, kenž jo rad pśestajił serbsku literaturu. Jogo narodny źeń, ten 5. januar 1916, jo se minuł mimo togo, až by na njogo spominali. Škóda, Mina Witkojc by nam to kradu za złe měła, ga běšo wón jeje bratšojski pśijaśel, což jeju zmakanja a listowanje pokazuju. Teke Jurij Brězan jo se z nim pózmakał a rozgranjał.
Jurij Brězan
Skałarjeju we górnoserbskich Worklecach njejo se cowało, ažo buźo jogo 9. junija 1916 roźony gólack raz wjelicny a sławny literat. Mógali groniś, pó Zejlerju a Bart-Ćišinskem ten wuznamnjejšy. Wót profesora D. Šołty kradosćiwje naźěłana biografija pśedstajijo se w Lipsku lětos na knigłowych wikach. Doma we Łužycy buźo literat dostojnje cesćony.