Z tymi barwjonymi warjonymi jajami wordujo wob swěźenje wence walkowane. Ta walka wordujo sobotu pśi wjacoru na jsy wuryta a pśigótowana a wuglěda ako do zemje zaśišćany klin, źo napośo (schräg) a cošku našyroko dołoj. Wóna jo zwjercha niźi 60–80 cm, spózy 1–1,25 m šyroka, na spódnem kóńcu 10–20 cm dłymoka a na 1,50 m dłujka. Walkuju źiśi a zrosćone. Mógu až do źaseśich we jadnej walce gromaźe walkowaś. Wšykne walkarje stajiju zrazom na spódny kóńc walki jadno jajo, źož kuždy co, teke do srjejźi jo pśiwdane. Pótom wordujo ten rěd wukjablowany, za kimž kuždy k walkowanju pśiźo. Nr. 1 wzejo swójo jajo z walki, scynijo jo na zwjerchnu kšomu, źož co, a pótusnjo a dajo jomu [se] dołoj kulaś.