„Wóstańśo doma“ raźe gójce a politikarje wšych krajow na wšyknych kontinentach, aby spadnuła licba chórych na koronawirusu (COVID-19). Mjaztym až w rědnych słyńckowatych dnjach móžoš se pó góli pśechójźowaś abo kólasowaś, w póchmurnych lubjej doma wóstanjoš. We wjele stronach swěta dajo kšutu kwarantenu. Doma wóstaś jo za wšake góźba se z wěcami zaběraś, za kótarež powšyknje mało casa dajo: knigły cytaś, basliś abo nowu rěc wuknuś.

Za górno- a dolnoserbsku rěc pśedlaže knigłowe ako teke digitalne wucbne srědki. Za zachopjeńkarje w serbskej rěcy dajo južo sprachkurs.sorbischlernen.de a naźěłajo se tuchylu w TU Drježdźany dalšny material. Teke portal Dyrdakojstwo (dyrdakojstwo.de) póbitujo materialije za wuknjenje dolnoserbskeje rěcy. Chtož co swóje znaśa serbšćiny doma testowaś, móžo pód sprachzertifikat-sorbisch.de wužywaś dane testy a snaź se teke móžo pózdźej na wopšawdne pśespytowanje znaśow w serbskej rěcy pśizjawiś.