Z Raduša/Raddusch. 17-lětna Lea Müllerojc jo sebje radušańske wustawadlišćo ako kreatiwny rum wuzwóliła. Pópšawem by musała na tom dopołdnju na Gymnaziumje Paula Fahlischa w Lubnjowje za abituru wuknuś, ale dla znatych pśicynow to njejźo.

Lea Müllerojc bydli njedaloko wustawadlišća za cołny. Jano pór kšoceń, a juž jo se zanuriła do śichosći Błotow. How namakajo pokoj za swój nejlubšy hobby – mólowanje. „Za abituru móžom we kuždem drugemu casu hyšći do knigłow glědaś – źinsa jo wjedro pśerědne, aby ja doma we jśpě sejźeła!“, groni wóna, wetom až wótcynijo swój kofer z barwikami.

Hynac ako wjele drugich mólarjow preferěrujo wóna barwiki. „Z nimi móžom wó wjele preciznjej źěłaś, barwowa paleta jo wjelicka – a to jo jadnorje cysćej“, wobtwarźijo wuzwólonu mólaŕsku techniku. Póglěd do jeje źěła to wobwěsćijo: Jeje specialita su cłowjecne wócy, tak do detaila se makajuce, až to pśedstajone se rowna fotografiji – jano z wjele mócnjejšym wurazom.