Z Chóśebuza/Cottbus. Wukniki Dol­no­­serbskego gymnaziuma změ­­­ju swóje pisne a wustne abiturne pśespy­towanja kradu pó planje – njeglědajucy na situaciju dla korona-wirusa, ako buźo se kněžyś we drugej połojcy apryla a w maju. Tu oficielnu powěsć jo šula stwórtk tyźeń dostała wót bramborskego ministaŕstwa za kubłanje – pjerwjej su wóni póžedanje za takim pśizwólenim pla ministaŕstwa stajili. To jo Casnikoju wulicowała wjednica DSG Anke Hille-Sickertowa.

Ministaŕka Britta Ernstowa jo dała k wěsći, až te pśespytowanja su za wukniki pśeliš wažne – absolwenty ga budu pśi pytanju za źěłom stojaś we konkurency z drugimi lětnikami a njedeje pśez wótstarcone abo wótpowěźone pśespytowanja do škódy pśiś. Šule mógu stakim sami wobzamknuś, lěc budu we doněnta wustajonych terminach pśespytowanja źaržaś abo lěc budu je na pózdźejšy cas wótstarcyś. Njebuźo-li regularna wucba we šulach pó jatšach pśiwdana, ga musy DSG, kaž druge šule teke, pśi pśespytowanjach kradu dopołniś wšykne standardy, což nastupa hygienu a miniměrowanje kontaktow mjazy wuknikami.