Sobotu su w dešańskem muzeju pyšnili jaja. Pśišłej stej mjazy drugimi Tabea (11) a Emely (7) z Brjazyny ze swójeju stareju mamu Christel Dehne z Magdeburga. „Nama jo se nejlěpjej spódobało jaja we barwje macaś a pótom pómałem a kradu wósk na nje mazaś“, wulicujotej źowći rozbuźonej. Teke Fröhnerojc familija z města jo była pódla. „Něnto akle smy sami nazgónili, kak wjele proce musyš how nałožyś. W telewiziji zda se to źěło wjele lažčejše a wóno se spěšnje wugba. Šwigersyn Torsten Walter guslujo rědne wutšobicki na swójo jajo, ak se jogo zlubjonej Fröhnerojc Martinje wjelgin spódoba. Wjednica muzeja Babette Zenkerowa jo jim pjerwjej rozkładła motiwy na serbskich jajach. „Chtož wót lubki abo lubkego dostanjo jajo z wutšobickami a wjele tśirožkami, ga z togo se wuznajo, až wón abo wóna co se ženiś“. Martina źo z góletkom, to jo kradu wiźeś, a Torsten jo jej w muzeju ned take wutšobickate jajo pódarił. „Wóno jo wjelgin rědne a se derje maka pśeto naju góle buźo nejskerjej se naroźiś jatšy“, jo se wjaseliła.