Z Drjowka/Drebkau. Muzej Serbska tkajarska śpa w Drjowku jo zacynjony, jatšowny mark a kurse za mólowanje wótpowěźone. Gaž njamóžomy lětosa jatšowne jajka mólowaś ze źiśimi drjowkojskeje zakładneje šule, pón póglědajomy my – sobuźěłaśeŕki Serbskeje tkajaŕskeje śpy – krotko slědk do zachadnych lět našogo procowanja wó zdźaržanje serbskich jatšownych tradicijow w Drjowku!
Južo wjele lět źěła muzej gromadu ze šulu, jeje ceptaŕkami a wuknikami, a ti se wě – wósebnje z wucabnicu za serbsku rěc Sabine Winkelmanoweju a jeje serbšćinarjami. Wóna cesto pśiźo na woglědat do našogo muzeja ze źiśimi a my jim pomogamy pśi serbskich zarědowanjach.
Kužde lěto se kněni Winkelmanowa pśed jatšam pšaša, lěc njamamy cas za kurs mólowanja jatšownych jaj. Pópšawem se to pśecej zarědowaś dajo. Ale raz – w lěśe 2017 – to njejo klapowało, dokulaž pśed prozninami jo tak wjele rědownjow a drugich kupkow rezerwěrowało terminy za kurse, až smy musali jej wótgroniś, bóžko.