Z Města/Chóśebuz. Dolnołužyske towaristwo za stawizny a krajowědu jo musało wótpowěźeś swójo nalětne zejźenje, ako jo dejało byś sobotu, 28. měrca, w Měsćańskem muzeju Chóśebuz. Pó planowanem dnjownem pórěźe by tam na pśikład dr. Alfred Rogan serbske pomniki a lisćinu pomnikow w Bramborskej pśedstajił, dr. Pětš Šurman by pśedst-ajił internetowy portal „Sorabicon“ a dr. Vinzenz Czech by pśedstajił internetowy portal „Brandenburgikon“.

Zjawne pśedstajenje we pśiducem casu móžne njebuźo, weto móžośo sami na te boki póglědaś a tam zawěsće młoge zajmne namakaś. Informěrujśo se na pśikład wó pomnikach wašogo regiona na bokach Bramborskego krajnego amta za wótwardowanje pomnikow a Archeologiskego krajnego amta pód https://bldam-brandenburg.de. Pód „Denkmale“ namakajośo lisćinu pomnikow za wšake regiony.

Digitalny portal „Sorabicon“ (http://www.sorabicon.de) jo póbitowanje Serbskego instituta, ako prezentěrujo wědu wó rěcy, historiji a kulturje Serbow. Pśedstajiju tam teke wuslědki wšakich slěźeńskich projektow. A maśo pśistup k Serbskej bibliografiji.