„W slědnych lětach jo se pśecej zasej stało, až jo se jaden wuknik 9. lětnika wót Dolnoserbskego gymnaziuma pśedstajił a se wopšašał, lěc smějo nastupiś swój regularny tśityźeński praktikum w serbskej rozgłosowej redakciji. Ale až něchten pśiźo a powěda skóro perfektnje serbski, to jo njewšedna a tejerownosći wjelicna wěc“, gódnośi šefowka serbskego radija pśi rbb w Chóśebuzu Marion Stenselowa. Z tym wuknikom, kótaryž jo se w serbskej rěcy procował wó městno za praktikum, měni źewjetkarja Eliasa Bisse. Wón jo ju ze swójim wustupjenim tak pozitiwnje pśechwatał, až jo se mógała pśedstajiś dobre zgromadne źěło z nim, wót cogož wobej boka móžotej profitěrowaś.

Elias jo zachopjeńk februara nastupił swój praktikum w rozgłosowem domje na Barlinskem naměstnje, a mimo njogo teke jogo rědowniska towariška Florence Zachau. Wobej pak stej se njewótwisnej jaden wót drugego procowałej wó městno.

„Flo“ Zachau nam wulicujo, až se zajmujo pśecej južo za swět medijow. Móžno, až buźo pózdźej raz we medijowej branžy źěłaś. Stakim Florence a Elias se derje góźitej za medijowy praktikum.