Lubnjow/Lübbenau. Pśed 85 lětami, dnja 1. apryla 1935, su pśišli tśo Barlinarje na pśikaz wušeje statneje mócy Nimskego rajcha do Lubnjowa. To su byli pśi rajchskem ministarju Joseph Goebbelsu do njegnady padnjony žurnalist, publicist a spisowaśel Ehm (Emil) Welk (1884-1966), jogo žeńska Agathe Linderojc-Welkowa (1892-1974) a jogo nan Gottfried Welk (1847-1938). Wóni su zaśěgnuli do bydlenja na droze Dammstraße. Źinsa dopomina wopomnjeńska tofla pśi domje na tu historisku slězynu.

Gaž wobmyslijomy, až Ehm Welk jo za swóje kritiske smužki we zjawnem lisće, kenž jo se wózjawił w njeźelskem casniku „Grüne Post“, samo nakrotko do koncentraciskego lěgwa Oranienburg interněrowany wordował, słuša jogo zakwartěrowanje w lubnjojskej Dammstraße ku glucnym momentam jogo žywjenja. Pśedewšym solidarita wjelich pśijaśelow a žurnalistow z wukraja jo k tomu pśinosowała, až tomu tencas 51-lětnemu jo se dostał „jano“ pówołański zakaz na wótere lěta a nic „šćitna pópajź“ w koncentraciskem lěgwje.