Zagronity za nastupnosći Serbow w Bramborskej, statny sekretaŕ we bramborskem ministaŕstwje za kulturu a wědomnosć Tobias Dünow (SPD), jo stwórtk tyźeń pśebył ceły źeń w Dolnej Łužycy . Wón jo woglědał do janšojskeje šule „Krabat“, do serbskeje redakcije regionalnego studija rbb w měsće, do Rěcnego centruma Witaj, do Šule za dolnoserbsku rěc a kulturu, do Serbskego muzeja a naslědku teke k nam do redakcije Nowego Casnika.

„Za mnjo jo to nejpjerwjej intensiwna faza wuknjenja, a ja njamam hyšći preciznu bildu, pśede mnu jo hyšći daloka droga“ – jo gósć na kóńcu togo dłujkego dnja nam gronił. A wón jo pśistajił: „Což som wuznał, jo: Serbske žywjenje jo wjelgickano wjeleserake. Wšuźi dajo problemy, wšuźi pak su luźe ze zapalonosću pódla, a ty wiźiš, až ten angažement jo wěrnosćiwy“. Za jogo suźenim njaso to pilnowanje widobne płody, a teke we wócyma wětšynoweje nimskeje towarišnosći jo naglědnosć serbskeje kultury a rěcy pśibrała – teke to jo płod serbskego źěła.